ଚଳିତ ବିଶ୍ୱକପ ପରେ କୋଚ ଭାବେ ରାହୁଲ ଦ୍ରାବିଡଙ୍କ କାର୍ଯ୍ୟକାଳ ଶେଷ ହୋଇଯିବ କି? ଏହି ଚର୍ଚ୍ଚା ଏବେ ଜୋର ଧରିଛି | ବାସ୍ତବରେ ଟି -୨୦ ବିଶ୍ୱକପ ୨୦୨୧ ପରେ ରବି ଶାସ୍ତ୍ରୀଙ୍କ ସ୍ଥାନରେ ରାହୁଲ ଦ୍ରାବିଡଙ୍କୁ କୋଚ କରାଯାଇଥିଲା। ଭାରତୀୟ ଦଳର ମୁଖ୍ୟପ୍ରଶିକ୍ଷକ ଭାବରେ ରାହୁଲ ଦ୍ରାବିଡଙ୍କ କାର୍ଯ୍ୟକାଳ ୨ ବର୍ଷ ଥିବାବେଳେ, ଯାହା ବିଶ୍ୱକପ ପରେ ଶେଷ ହେବ। ଆଉ ବିଶ୍ୱକପ୍ ଫାଇନାଲ୍ କୋଚ୍ ଭାବରେ ରାହୁଲ ଦ୍ରାବିଡଙ୍କ ପାଇଁ ଶେଷ ମ୍ୟାଚ୍ ହୋଇପାରେ ବୋଲି କୁହାଯାଉଛି ।
ଅର୍ଥାତ ବିଶ୍ୱକପ ପରେ ରାହୁଲ ଦ୍ରାବିଡ଼ ଭାରତୀୟ କ୍ରିକେଟ୍ ଦଳର କୋଚ୍ ହୋଇ ରହିବେ ନାହିଁ। କାରଣ ମିଡିଆ ରିପୋର୍ଟ ଅନୁଯାୟୀ, ଏପର୍ଯ୍ୟନ୍ତ ବିସିସିଆଇ ରାହୁଲ ଦ୍ରାବିଡଙ୍କ ସହ କୌଣସି ନୂତନ ଚୁକ୍ତି ସମ୍ପର୍କରେ ଆଲୋଚନା କରି ନାହିଁ। କୁହାଯାଉଛି ଯେ ରାହୁଲ ଦ୍ରାବିଡ ଏବଂ ବାକି ସପୋର୍ଟ ଷ୍ଟାଫଙ୍କୁ ନେଇ ବିସିସିଆଇ ମଧ୍ୟରେ ଭିନ୍ନ ମତ ରହିଛି ।
ପ୍ରକୃତରେ, ପ୍ରଥମେ ବିସିସିଆଇର ବରିଷ୍ଠ ଅଧିକାରୀମାନେ ରାହୁଲ ଦ୍ରାବିଡଙ୍କ କୋଚିଂ ଶୈଳୀ ଉପରେ ଆପତ୍ତି କରିଥିଲେ, କିନ୍ତୁ ବର୍ତ୍ତମାନ ଭାରତୀୟ ଦଳର ପ୍ରଦର୍ଶନ ପରେ ଦୃଶ୍ୟ ବଦଳିଛି। ଏହା ମଧ୍ୟ କୁହାଯାଉଛି ଯେ ରାହୁଲ ଦ୍ରାବିଡଙ୍କ କାର୍ଯ୍ୟକାଳକୁ ନେଇ ଦ୍ବନ୍ଦ୍ବ ରହିଛି | କିନ୍ତୁ ବ୍ୟାଟିଂ ପ୍ରଶିକ୍ଷକ ବିକ୍ରମ ରାଠୋଡ, ବୋଲିଂ ପ୍ରଶିକ୍ଷକ ପାରସ ମହାମ୍ବରେ ଏବଂ ଫିଲ୍ଡିଂ କୋଚ ଟି ଦିଲୀପଙ୍କ ଚୁକ୍ତିକାଳ ବଢ଼ା ଯାଇପାରେ ।
ଏଥି ସହିତ ଏହି ବିଶ୍ୱକପ ପରେ ଭାରତୀୟ ଦଳ ଅଷ୍ଟ୍ରେଲିଆ ବିପକ୍ଷରେ ଟି -୨୦ ସିରିଜ୍ ଖେଳିବ। ଏହି ସିରିଜର ପ୍ରଥମ ମ୍ୟାଚ୍ ୨୩ ନଭେମ୍ବରରେ ଖେଳାଯିବ | ଭାରତ ଏବଂ ଅଷ୍ଟ୍ରେଲିଆର ଦଳ ବିଶାଖାପାଟଣାରେ ମୁହାଁମୁହିଁ ହେବେ। ଏହି ସିରିଜରେ ରାହୁଲ ଦ୍ରାବିଡଙ୍କ ସ୍ଥାନରେ ଭିଭିଏସ୍ ଲକ୍ଷ୍ମଣ କୋଚ୍ ଭାବରେ ନଜର ଆସିବେ। ତେବେ ରାହୁଲ ଦ୍ରାବିଡଙ୍କ କାର୍ଯ୍ୟକାଳକୁ ନେଇ ବିସିସିଆଇ କଣ ନିଷ୍ପତ୍ତି ନେବ ତାହା ଦେଖିବାକୁ ବାକି ରହିଲା |
