ଅଧିନାୟକ ରୋହିତ ଶର୍ମା ଟିମ୍ ଇଣ୍ଡିଆକୁ ଭଲ ଷ୍ଟାର୍ଟ୍ ଦେଇଥିଲେ । ସେ ୪୭ ବଲ୍ରେ ୫୮ ରନ୍ ସଂଗ୍ରହ କରିଥିଲେ । ଏହି ସ୍ଲୋ ପିଚ୍ରେ ବି ସେ ୭ଟି ଚୌକା ଓ ୩ଟି ଛକା ମାରିଥିଲେ। ଗୋଟିଏ ସମୟରେ ଭାରତ ବିନା କୌଣସି ୱିକେଟ୍ରେ ୭୫ ରନ ସ୍କୋର କରିଥିଲା, କିନ୍ତୁ ଏହା ପରେ ଦଳ ବଡ଼ ଭାଗିଦାରୀ ପାଇଁ ଟିମ୍ ଇଣ୍ଡିଆ ସଂଘର୍ଷ କରିବାରେ ଲାଗିଲା । ଏହି ମ୍ୟାଚରେ ଭାରତର କମ୍ବ୍ୟାକ୍ କରିଥିବା କେ.ଏଲ୍ ରାହୁଲ ଏବଂ ଅକ୍ଷର ପଟେଲଙ୍କ ମଧ୍ୟରେ ୫୭ ରନ୍ ଭାଗିଦାରୀ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା । ଶେଷରେ ଶିବମ୍ ଦୁବେ ବି ୨୫ ରନ୍ର ଏକ କ୍ୟାମୋ ଇନିଂସ ଖେଳିଥିଲେ, କିନ୍ତୁ ଏହା ଦଳକୁ ବିଜୟ କରାଇବାକୁ ଯଥାର୍ଥ ନଥିଲା ।
ପ୍ରଥମେ ବ୍ୟାଟିଂ କରି ଶ୍ରୀଲଙ୍କା ୮ ୱିକେଟ ବିନିମୟରେ ୨୩୦ ରନ୍ ସ୍କୋର କରିଥିଲା । ଏଥିରେ ସବୁଠାରୁ ବଡ ଅବଦାନ ଥିଲା ଦୁନିଥ ୱେଲାଲାଗେଙ୍କର । ସେ ୬୫ଟି ବଲ୍ରେ ୬୭ ରନର ଅପରାଜିତ ପାଳି ଖେଳିଥିଲେ । ତାଙ୍କ ବ୍ୟତୀତ ପଥୁମ୍ ନିଶଙ୍କା ୭୫ ବଲ୍ରେ ୫୬ ରନ୍ ସଂଗ୍ରହ କରିଥିଲେ । ମାତ୍ର ୧୦୦ ରନ୍ରେ ଅଧା ଟିମ୍ ପାଭିଲିୟନ ଫେରିବା ପରେ ବି ଶ୍ରୀଲଙ୍କା ୨୩୦ ରନ୍ କରିବାରେ ସଫଳ ହୋଇଥିଲେ ।
ଅନ୍ୟପକ୍ଷରେ ଯେତେବେଳେ ଟିମ୍ ଇଣ୍ଡିଆ ଏହି ଟାର୍ଗେଟର ପିଛା କରିବାକୁ ଯାଇ ଅଧିନାୟକ ରୋହିତ ଶର୍ମା ଆରମ୍ଭରୁ ଆକ୍ରମଣାତ୍ମକ ବ୍ୟାଟିଂ ଆରମ୍ଭ କରିଥିଲେ । ରୋହିତ ପିଚ୍ରେ ଥିବାବେଳେ ଦଳର ରନ୍ ହାର ଓଭର ପିଛା ୬ରୁ ଅଧିକ ଥିଲା, ସେ ୪୭ ବଲରେ ୫୮ ରନ୍ ସ୍କୋର କରିବା ପରେ ଆଉଟ୍ ହୋଇଥିଲେ। ଶୁଭମାନ ଗିଲ ମଧ୍ୟ ମାତ୍ର ୧୬ ରନ୍ ସ୍କୋର କରିବା ପରେ ଆଉଟ୍ ହୋଇଥିଲେ ।
ୱାଶିଂଟନ୍ ସୁନ୍ଦରଙ୍କୁ ବ୍ୟାଟିଂ କ୍ରମରେ ୪ ନମ୍ବରରେ ପଠାଯାଇଥିଲା, ହେଲେ ସେ ମାତ୍ର ୫ ରନ୍ ସ୍କୋର୍ କରିବା ପରେ ଆଉଟ୍ ହୋଇଥିଲେ । ବିରାଟ କୋହଲି ମଧ୍ୟ ପ୍ରାୟ ୯ ମାସ ପରେ ଦିନିକିଆ ମ୍ୟାଚ୍ ଖେଳିବାକୁ ପଡିଆକୁ ଆସିଥିଲେ, ମାତ୍ର ୨୪ ରନ୍ ସ୍କୋର କରି ସେ ହାସାରଙ୍ଗାଙ୍କ ଶିକାର ପାଲଟିଥିଲେ । ଗୌତମ ଗମ୍ଭୀର ମୁଖ୍ୟ କୋଚ୍ ହେବା ପରେ ଶ୍ରେୟସ୍ ଆୟର ଦଳକୁ ଫେରିଛନ୍ତି ଏବଂ ବଡ ଇନିଂସ ଖେଳି ଦଳରେ ତାଙ୍କ ସ୍ଥାନକୁ ପକ୍କା କରିବାର ସୁଯୋଗ ପାଇଥିଲେ, କିନ୍ତୁ ତାଙ୍କ ବ୍ୟାଟ୍ରୁ ମାତ୍ର ୨୩ ରନ୍ ବାହାରିଥିଲା ।
ଏକ ସମୟରେ ଭାରତୀୟ ଦଳ ୧୩୨ ରନ୍ ପାଇଁ ୫ ୱିକେଟ୍ ହରାଇଥିଲା ଏବଂ ଜିତିବା ପାଇଁ ୯୯ ରନ୍ ଆବଶ୍ୟକ ଥିଲା । କେ.ଏଲ୍ ରାହୁଲ ଏବଂ ଅକ୍ଷାର ପଟେଲଙ୍କ ମଧ୍ୟରେ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଭାଗିଦାରୀ ହୋଇଥିଲା । କେ.ଏଲ୍ ରାହୁଲ ୪୩ ବଲରେ ୩୧ ରନ୍ ସଂଗ୍ରହ କରିଥିବାବେଳେ ଅକ୍ଷର ପଟେଲ ପୁଣିଥରେ ତାଙ୍କ ବ୍ୟାଟିଂ ଦକ୍ଷତା ସହିତ ସମସ୍ତଙ୍କୁ ପ୍ରଭାବିତ କରିଥିଲେ । ସେ ୫୭ ବଲରେ ୩୩ ରନ୍ ସଂଗ୍ରହ କରିଥିଲେ । ୪୮ତମ ଓଭରରେ ଆଶାଲଙ୍କା ଦୁଇଟି ୱିକେଟ ନେଇ ଶ୍ରୀଲଙ୍କାରୁ ପରାଜିତ ହେବାକୁ ରକ୍ଷା କରିଛନ୍ତି । ଫଳରେ ଏହି ମ୍ୟାଚ୍ ଟାଇରେ ଶେଷ ହୋଇଛି ।
